نجوى

كتبهامحمود مرسي ، في 5 يونيو 2007 الساعة: 01:35 ص

…..

تروح النـظرة من عينـك على عنيه

ولسـه القرب من قلبك بعيـد عني

وبسمة حب مرسومه على قلوبنا

…

وغنوة حب مـا نسـيتها ولا ثانيـة

وكلمة حب ما تقاليتش ليـك مني !ـ

حياتنا ازاي وطول البعد ده بينا

…..

وعمر ازاي ما فيش فيه وصال ولا شويه

تعالى نعيش وننسى الدنيـا ونغني

ولا يأثرش فينا عزول يقول عنا

…..

كلام الناس على وصالنا وعلى الدنيا

وحكم الناس على حياتنا ده إيه يعني

لا ح يزود ولا ينقَّص حياه منا

…

..يا أحلى حب قلبي اتمنى يحلـم بيـه

تنور من ضيـاء شـمعاته أحلامه

يا حب معاه يادوب الدهر يكفينا

…..

يا أجمل قلب قلبي اتمنى يوصـل ليه

يابهجة عمر فيه سـنواته أيامـه

يارب تكـون أمـانيَّ أمانينـا

…..

ما كان يفضل على وصالنا يادوب ألاقيه

بين القلبين وينسى الحب آلامه

يارب تكون ـ نعيش تحلى ليالينـا

…..

 بقالي سنين وانا مشـتاق أعيش لياليه

واحس ف صحبه ويَّا عنيك بأنغامه

تشـاغلنا وتعاهدنـا تدوم لينـا

…..

دي غنوة حب ما نسـيتها ولا ثانيه

ولسـه القرب من قلبك بعيد عني !ـ

حياتنا ازاي وطول البعد ده بينـا

ـــــــــــــــــــــــــــــــــــــــــــ

 

تجيني النظره مش بافهـم معانيهـا

ولما تروح بافكر إيه يكون قصـدك

معاني كتير ياربي كان إيـه معناهـا

 

يارب القصد م النظره أدوب فيها ؟

يا نـور الحب ريحني وقــول ردك

دنا باهواك يا أجمل زهره شـفناها

…..

بسحر عنيك وبرموشـك حواليها

سحرت عنيـَّه والجنـه على خدك

هواك النظره بتشـيله ف مغزاها ؟

…. 

شفايفك سـاكته مش بتدلني بيها

في سـكتتها جمال ما يبانش غير عندك

بادوب ويـاه لكـن حيرني وياهـا

…..

يا بسمه حلوه ف عيونه بالاقيهـا

قولي له رد عن قلبك بلاش صـدك

قولي له يلين على شـفايفه وينساها

…..

تروح للكلمه وتقولهـا وتحكيهـا

معشم بيها قلب ما داقش غير بعدك

ياريت تسـمع قوالتها وترضـاها

…..

وأشـعر في الحياه بسـمه تحليهـا

يارب تصون حبيب قلبي دنا عبدك

وبادعيلك تصـون زهره وترعاهـا

…..

 وتوصل بين قلوب هايمه وتواليهـا

د انـا باتمنى من قلبـك جمال ودك

يا وردة حب بين قلبين زرعناهــا

…..

وليه النظره من عينـك على عنيـَّه

ولسـه القرب من قلبك بعيد عني

حياتنا ازاي وطول البعـد ده بينـا

ـــــــــــــــــــــــــــــــــــــــــــ

 

يا شـمعة حب بتنـور حيـاة قلبي

وقلبي من ضيـاء نـورك بيوعدني

بأحلى وعـود تعيش وياها آمـالي

….. 

تفـوت مره ببهجـة عمر من جنبي

ولا تقوليش على كلمه بتسـعدني

ونفسي أقولهـا أو إنت تقولهـالى

…..

تفـوت ازاي على عطشـان وبتخبي

معاك شـربات وتقدر منه ترويني

ولو كان مُـرْ عايزك منـه تملالي

…..

ونفسي تقول .. معـاك الميه إيه ذنبي

أعيش اتمنى نقطــة ميـه تديني

ونقطه واحـده والله يارب تحلالي

…..

 وباحلف لك بكــل يمين ونـور ربي

طول الأيـام بامني نفسي ترضيني

بكلمة حب تإسـرني وتهنـالي

…..

بنص إشــارة تلـقى قلـبي بيـلبي

نِـدا قلبك ولا فيه حاجه تبعدني

ده ف اللحظه سـعادة عمر تبقالي

…..

حاولت وكل مره بادوق معـاك غلبي

وقبل ما اقول كلامي مش بتسمعني

لكن ف عنيك بالاقي نظره جيالي

 …..

تروح النظره من عينـك على عنيـَّه

ولسـه القرب من قلبك بعيد عني

حياتنا ازاي وطول البعـد ده بينا

ـــــــــــــــــــــــــــــــــــــــــــ

 

ساعات القلب بيقولي جايز ما هَوَاك

باقول الكلمه مش يمكن بتسـتناك ؟

أو الأيـام في يـوم ناويه تقربنا ؟

…..

يقول الفكر من غلبه دنا ح انساك

بافكر فيك وصورتك في الخيال بقياك

ح اعيش ويَّاها لو فيه حاجه تبعدنا

…..

 كفايا الشعر ع الخدين ياخدني معاك

ونظرة عين بتضمن لك أهيـم بهواك

الشـفه أسرت كلام يفَرَّحنا

…..

ح اعيش استنى لما الكلمه تنسى جفاك

وتحكيها وحواليها أحس رضـاك

واحس معاك حنان قلبـك بيرعانا

…..

ومن عطفك على القلب اللي يتمناك

يطول العمر واسـعد بالغرام وياك

واشوف ف الدنيا كل الدنيا تهوانا

…

دي رقة نسـمه أو رقة أرق ملاك

وجنة حب كل زهورها صـحبه معاك

باشوفها لما اشوف طيفك بيوصلنا

…..

ولـو حتى أقَضِّي العمـر أسـتناك

ما دام توعدني إني ف مره راح ألقاك

ده يومها الدنيا مش ممكن تقَضِّينا

…..

يا أحلى ربيـع لزهرة حب تتمناك

ومن سـحرك بترويها ومن نجـواك

تحليهـا وتِحْلى بيهـا أيامنــا

…..د انـا باهـواك

ـــــــــــــــــــــــــــــــــــــــــــ

ـــــــــ